Uncategorized

Sumaropnunartími

Göngudeildin er nú á sumartíma og er opið sem hér segir:

Mánudagar 9:30 – 16:30

Þriðjudagar LOKAÐ

Miðvikudagar 9:30 – 16:30

Fimmtudagar 9:30 – 16:30

Föstudagar LOKAÐ

 

Hlökkum til að sjá ykkur.

Read more

Aðalfundur 2021

Aðalfundur félagsins var haldinn 15. apríl á Zoom og tókst hann með ágætum. 

Kosin var um tvo aðila í aðalstjórn og gáfu Arnþór Jón Egilsson og Elín Helga Hauksdóttir sem verið hafa í stórn kost á sér til endurkjörs og voru þeu einróma kjörin. Hjálmar A. Jónsson gaf kost á sér í varastjórn og var hann einnig kjörinn einróma.

Samþykkt var að hækka félagsgjöld lítilega en þau hafa verið óbreytt í fjölda ára. verða gjöldin eftirfarandi: Almennt gjald verði 3.900 kr., 1.950 kr. fyrir ellilífeyrisþega og öryrkja og 5.850 kr. fjölskyldugjald.

Farið var yfir skýrslu stórnar og reikninga og voru hvorutveggja borið upp og samþykkt.

Hér  að neðan kemur skýrsla stjórnar sem fer yfir það helsta frá síðasta ári og hvað er framundan. 

Starf núverandi stjórnar hófst seinna en venja er vegna Covid 19 en aðalfundur félagsins var haldinn 3. júní 2020. Úr stjórn gengu Gautur Sturluson, Sveinn Óskar Hafliðason og Þórdís Magnúsdóttir. Inní stjórnina komu Drífa Ósk Sumarliðadóttir og Sigrún Dóra Hemmert Bergsdóttir. Þar sem ekki náðist að fá varamenn í stjórn er stjórnin skipuð 5 aðalmönnum. Formaður Þorsteinn Þorsteinsson, gjaldkeri Elín Hauksdóttir, varaformaður Arnþór Jón Egilsson, meðstjórnendur eru Drífa Ósk Sumarliðadóttir og Sigrún Dóra Hemmert Bergsdóttir.

Félagar voru rétt um 1200 þegar núverandi stjórn tók við og eru núna 1228 svo að okkur hefur lítilega fjölgað.

Fyrsta verk núverandi stjórnar var að ráða skrifstofustjóra í stað Ísabellu sem ákvað að koma ekki til starfa að afloknu fæðingarorlofi. Stjórnin var sammála að ráða formann félagsins í 50% starf og tók hann til starfa 1. ágúst. Ráðist var í að koma nýju áskriftarkerfi í gagnið en þetta mál hafði legið niðri og í raun frá því 2019 þannig að ekkert félagsgjald var innheimt fyrir það ár. Eftir að þetta komst í gagnið var sendur út tölvupóstur með upplýsingum til félagsmanna og bréf í pósti til þeirra sem ekki eru með skráð netföng hjá okkur. Þarna var þetta mál útskýrt og óskað eftir að þeir sem aflögufærir væru legðu inn á reikning okkar andvirði árgjalds fyrir árið 2019. Nokkur fjöldi varð við því. Þar sem þetta er nú komið í fastan farveg ætti svona lagað ekki að koma fyrir aftur.

Við höfum verið að vinna í heimasíðu okkar meðal annars að bæta hraðan á henni með því að koma hýsingu hennar til nýs aðila. Einnig erum við að vinna að uppsetningu pöntunarkerfis/verslunar þar sem við munum vera með meðferðarvörur á boðstólnum á hagstæðu verði fyrir félagsmenn.

Heimsfaraldurinn hefur auðvitað sett sitt mark á starfið. Í byrjun hans urðum við að loka göngudeildini um tíma og síðan breyta opnunartíma til að tryggja öryggi. Sumaropnun tók svo við í júní og gekk sumarið mjög vel fyrir sig. Við breyttum svo aftur í hefðbundin opnunartíma í september og höfum haldið fullum dampi síðan án nokkurra vandræða. Þetta hefur tekist með því að fylgja öllum ítrustu sótvarnarreglum og á starfsfólk okkar heiður skilinn fyrir hvað þetta hefur gengið vel. Aukning hefur verið í aðsókn að göngudeildinni sem ég tel að rekja megi til frábærrar þjónustu sem veitt er þar auk meiri sýnileika til dæmis á facebook.

Alþjóðadagurinn var haldin 29. október að venju. Þar sem hertar sóttvarnarreglur höfðu tekið við á þessum tíma var fundurinn haldinn á Zoom og tókst hann í alla staði mjög vel. Ávarp var flutt frá Svandísi Svavarsdóttir heilbrigðisráðherra en hún forfallaðist svo að aðstoðarmaður hennar Iðunn Garðarsdóttir flutti erindið. Fyrirlesarar á fundinum voru Ásta Friðriksdóttir frá Alvotek sem talaði um líftæknilyf, Bárður Sigurgeirsson sem flutti erindi undir yfirskriftinni “Psoriasis ekki bara húðsjúkdómur” og að lokum Erla Björnsdóttir sálfræðingur sem fjallið um “Betri svefn – grunnstoð heilsu”. Þar sem þetta fyrirkomulag gerði það að verkum að við gátum tekið upp erindin þá eru þau aðgengileg á facebook síðu okkar.

Við höfum verið að vinna að því í nokkur ár að endurskoða bæklinga okkar og annað kynningarefni og var því verki haldið áfram á síðasta ári og erum við nú komin með leiðbeiningar fyrir sjúklinga sem eru þýddar úr dönsku en við höfum gert samning við félaga okkar hjá dönsku samtökunum um að fá aðgang að þeirra efni. Danir standa mjög framarlega í starfi fyrir sjúklinga með psoriasis og erum við því mjög ánægð með þetta samkomulag. Þetta efni verður síðan gefið út í rafrænu forni jafnóðum og það verður tilbúið.

Við höfum tekið þátt í okkar alþjóðlega samstarfi á vettfangi Nordpso og IFPA með rafrænum hætti en allir fundir sem fyrirhugaðir voru færðir yfir á netið. Verið er að vinna skýrslu á vettfangi Nordpso um stöðu loftslagsmeðferða en það hefur verulega dregið úr þessum meðferðum. Það er tilfinning margra að þessar meðferðir þyrftu að vera í boði fyrir þann hóp sem þetta hefur gagnast fyrir og er þessari skýrslu ætlað að leiða í ljós hvað sé best að gera varðandi þessi mál.

Núverandi stjórn hefur unnið mjög vel saman og allir viljugir til verka svo að það hefur ekki komið að sök þó engir varamenn hafi verið til staðar enda held ég að segja megi að fundarsókn hafi verið 100% sem er frábærlega gert. Einnig mættum við á aðalfund ÖBÍ og höfum tekið þátt í því starfi sem þar er í gangi. Undirritaður var í kjöri til stjórnar bandalagsins en náði ekki kjöri.

Reykjavík 26. febrúar 2021

Þorsteinn Þorsteinsson

Formaður

 

Viðbót til 15. apríl.

Frá því að þessi skýrsla var skrifuð þá hefur ýmislegt gerst og nefni ég það helsta hér.

Við bætum við starfshlutfallið hjá undirrituðum og er ég sjúkraliðum okkar til aðstoðar á föstudögum því að þá var alltaf ein á vakt og reyndist það of erfitt með þeirri auknu aðsókn sem verið hefur hjá okkur auk þess sem að mikil vinna hefur bæst við til að uppfylla sóttvarnarkröfur.

Ljósaskáparnir okkar sem eru frá Waldmann í þýskalandi eru orðnir nokkuð gamlir og einnig er að þetta fyrirtæki er hætt að framleiða svona skápa þannig að til dæmis þá er tölvukerfið ekki uppfært og einsýnt að það gæti valdið vanda innan fárra ára. Umboðsaðilinn hér á landi Icepharma hefur ekki komið með nein plön varðandi hvert þeir ætla að snúa sér varðandi innflutning skápa. Ég komst því í samband við fyrirtæki í Noregi sem þjónustað hafa norsku samtökin. Þetta fyrirtæki var einnig að selja Waldmann en hefur fundið annann birgja sem þeir bentu mér á. Ég sendi þeim póst til að athuga hvort að þeir hefðu aðila á Íslandi með sína vöru. Þetta leiddi síðan til þess að þeir fólu norðmönnunum að aðstoða okkur.

Við fengum frá þeim tilboð í tvo nýja skápa uppá rúmar 14 miljónir króna á gengi í mars. Þessir skápar hafa reynst vel í Noregi og tel ég það kost fyrir okkur að fá þetta frá aðila sem er að þjónusta þetta á stærri markaði.

Þegar við byrjuðum að skoða þetta þá var planið að kaupa kannski fljótlega einn skáp og annan svo kannski 2 árum síðar. Það er hinsvegar erfitt þegar ekki er hægt að samtengja skápana. Þannig að nú þurfum við að setja af stað áætlun um fjármögnun þessara kaupa á einu bretti. Hugmyndin er sú að stofna sjóð og byrja að safna í hann styrkjum til þessara tækjakaupa. Við sóttum um árlegan styrk til ÖBÍ um daginn og eyrnamerktum hluta hanns í þetta verkefni. Ef hann fæst mun það verða fyrsta innlegg í sjóðinn. Einnig er komið uppkast að bréfi til að senda á fyrirtæki og félagasamtök eins og Oddfellow, Lions, Frímúrara og fleyri til að biðja um að þeir leggi þessu málefni lið.

Um síðustu helgi var stefnuþing ÖBÍ haldið á Zoom og sátum við tvö úr stjórn þetta þing og komum okkar málefnum vel á framfæri.

Um næstu helgi verður Nordpso fundur haldin rafrænt og munum við einnig sitja tvö á þeim fundi.

Þannig að eins og sést á þessu er starfið blómlegt og næg verkefni framundan fyrir nýja stjórn.

 

Ritað 14. apríl 2021

Þorsteinn Þorsteinsson

Read more

Rannsók á erfðum psoriasis

Rannsókn á erfðum psoriasis

Spurningalistarannsókn um lífsgæði, líðan og einkenni, alvarleika, heilsufar og lífstíl einstaklinga með psoriasis

 

Nýlega hófst umfangsmikil rannsókn á psoriasis á Íslandi. Öllum psoriasissjúklingum búsettum  á Íslandi verður boðin þátttaka, sem felst í að svara spurningalista um um lífsgæði, líðan og einkenni, alvarleika, heilsufar og lífstíl einstaklinga með psoriasis. Er þetta í fyrsta skipti sem slík rannsókn nær til heillar þjóðar. Að rannsókninni standa Íslensk erfðagreining,  Háskóli Íslands, Húðlæknastöðin og Landspítalinn og í samvinnu við samtök psoriasis og exemsjúklinga (SPOEX-www.psoriasis.is).

 

Kári Stefánsson er ábyrgðarmaður rannsóknarinnar og aðrir rannsakendur eru Bárður Sigurgeirsson húðlæknir og prófessor, Björn Guðbjörnsson gigtlæknir og prófessor, Jón Hjaltalín Ólafsson dr. med. húðlæknir og Ragna Hlín Þorleifsdóttir dr. med. húðlæknir. Rannsóknin er hluti af rannsókn á erfðum psoriais, sem Íslensk erfðagreining og samstarfsaðilar vinna að. Þeim sem taka þátt í spurningalistarannsókn á lífsgæðum,  líðan og einkennum, alvarleika, heilsufari og lífstíl býðst einnig að taka þátt í í erfðarannsókninni. Ýmsir sérfræðingar hjá Íslenskri erfðagreiningu vinna að rannsókninni, og hluti af spurningalistarannsókninni er BS rannsóknaverkefni Kristjáns Veigars Kristjánssonar læknanema.

 

Um psoriasis

Psoriasis er langvinnur bólgusjúkdómur í húð og liðum, og er birtingarmyndin fjölbreytt; frá örfáum hreistrandi blettum í húð upp í að nánast öll húðin sé þakin blettum. Sjúkdómnum geta einnig fylgt bólgur í liðum og sinafestum (psoriasisgigt).  Skilningur læknavísindanna hefur aukist á undanförnum árum.  Það er ekki lengur litið á psoriasis sem „bara húðsjúkdóm“ heldur er hér um að ræða kerfislægan sjúkdóm sem getur lagst á mörg líffærakerfi. Þannig er tíðni hjarta- og æðasjúkdóma, sykursýki og efnaskiptavilla algengari hjá einstaklingum með psoriasis.  Dánartíðni psoriasissjúklinga er aukin, en lækkar ef notuð eru líftæknilyf. Sjúkdómurinn veldur miklu andlegu og félagslegu álagi og dregur mjög úr lífsgæðum sjúklinga. Mikill kostnaður fylgir sjúkdómnum bæði fyrir heilbrigðiskerfið og sjúklinga, sérstaklega þá sem hafa verstan sjúkdóm sem þurfa að taka ónæmisbælandi lyf sem geta kostað milljónir króna á ári fyrir hvern sjúkling. Orsakir sjúkdómsins eru ekki að fullu ljósar en þekktir áhættuþættir eru t.d. fjölskyldusaga, erfðaþættir, lyf, reykingar, álag, áfengi og offita.

 

Engar upplýsingar eru til  um nýgengi og algengi psoriasis hér á landi. Talið er að algengi sjúkdómsins sé um 2-3% í flestum vestrænum löndum. Það má því áætla að á Íslandi séu um 6-10 þúsund einstaklingar með sjúkdóminn. Tölur um nýgengi og algengi eru mikilvægar til að skilja betur álag og kostnað heilbrigðiskerfisins vegna sjúkdómsins.

 

Rannsóknin

Rannsóknin hefur fengið leyfi Vísindasiðnefnd hafa rannsakendur fengið aðgang að upplýsingum um þá sem greinst hafa með psoriasis á Íslandi.

 

Upplýsingar um sjúklingana eru fengnar frá stofum sérfræðinga og Landspítalanum og ættu því að ná til flestra íslenskra psoriasissjúklinga. Unnið er með allar upplýsingar nafnlaust og er þar notast við dulkóðunarkerfi Íslenskrar erfðagreiningar.

 

Markmiðið með að fá svör við spurningalistum er að kanna lífsgæði og hagi íslenskra psoriasissjúklinga og þau vandamál sem fylgja því að hafa psoriasis.  Í rannsókninni  verða upplýsingar um heilsufar, líðan og lífsgæði bornar saman við fyrirliggjandi upplýsingar um erfðabreytileika, fyrir þann hluta sjúklinga sem það á við um, til að skilja betur áhættuþætti og orsakir psoriasis og psoriasisgigtar. Svör þátttakenda geta veitt mikilsverðar upplýsingar um tengsl erfðabreytileika við tilurð psoriasis. Slík þekking getur leitt til nýrra leiða til að fyrirbyggja og meðhöndla sjúkdóma og þegar fram í sækir verða upplýsingar af þessu tagi forsenda aðgerða til að geta bætt lífsgæði psoriasissjúklinga.

 

Spurningalisti verður lagður rafrænt fyrir þátttakendur og þeir undirrita samþykkisyfirlýsingu með rafrænum skilríkjum. Einstaklingum sem  hafa greinst með psoriasis og/eða psoriasisgigt verður boðið að svara spurningalista um heilsufarssögu, lífsgæði og líðan og einkenni  psoriasis. Einnig um útbreiðslu og alvarleika sjúkdómsins til að reikna út útbreiðslu- og alvarleikastuðul, svokallaðann PASI stuðul. Þátttakendur fá niðurstöðu um PASI stuðul sinn og býðst síðan að svara spurningum um psoriasis, almennt heilsufar og lífsstíl í lokin.

Einstaklingum sem hafa greinst með psoriasis og/eða psoriasisgigt verður sendur hlekkur í síma og geta þeir þá svarað könnuninni rafrænt. Gögn verða póstlögð til þeirra sem ekki hafa skráð farsímanúmer.

 

Þeim sem hafa áhuga á að taka þátt í rannsókninni, en hafa ekki fengið boð, er bent á að hafa samband við Þjónustumiðstöð rannsóknaverkefna, sími 520-2800, www.rannsokn.is

 

 

Read more

Fyrirlestur um margar gerðir psoriasis á Alþjóðadegi Psoriasis 2020

Fyrirlestur Bárðar Sigurgeirssonar “Psoriasis: Ekki Bara Húðsjúkdómur” á Alþjóðadegi Psoriasis 29. október 2020

Psoriasis: Ekki Bara Húðsjíkdómur á YouTube

Read more

Fyrirlestur um Alvotech og Biosimilar Líftæknilyf á Alþjóðadegi Psoriasis 2020

Ásta Friðriksdóttir fjallar um Alvotech og líftæknilyf á Alþjóðadegi Psoriasis 29. október síðastliðinn.

Biosimilar Líftæknilyf á YouTube

Read more

Tilkynning frá Stjórn.

Fyrsta verkefni nýrrar stjórnar var að setja í fullan gang uppfærslu á félagatalinu okkar sem hafði legið niðri frá í fyrra. Búið var að gera samning við Greiðslumiðlun um félagakerfi frá þeim sem heitir Redo. Stjórn félagsins tókst núna í byrjun ágúst að koma kerfinu í gagnið og fóru því út greiðsluseðlar fyrir félagsgjöldum okkar fyrir tvö síðustu ár.
 
Sökum reynsluleysis með nýtt kerfi fór þetta inní heimabanka fólks án skýringa. Upphaflega höfðum við gert ráð fyrir að senda þetta á tveim aðskildum seðlum og þá með einum valkvæðum fyrir árið í fyrra. Þetta hefði gefið fólki tækifæri á að greiða valkvæða seðilinn síðar.
 
Við viljum biðja afsökunar á að þetta fór svona. Til að koma til móts við þá sem eiga í vandræðum með að greiða þetta í einu lagi viljum við bjóða uppá þann valkost að millifæra fyrir öðru gjaldinu inná reikning félagsins í Íslandsbanka 0516-26-10039-kt-6801770239 og við munum þá fella niður greiðsluseðilinn og stofna nýjan valvæðan fyrir gjaldinu 2019.
Read more

Göngudeild opin.

Göngudeild SPOEX verður opin samkvæmt venju þrátt fyrir hertar aðgerðir vegna covid 19.

Við munum gæta fyllstu varúðar og fylgja öllum reglum um sprittun og annan þrifnað ásamt því að framfylgja tveggja metra reglunni. 

Þeir sem hafa verið á ferð þar sem veiran hefur greinst, verið í tengslum við smitaða eða hafið einkenni sem lýst hefur verið varðandi covid 19 eru beðnir að halda sig heima.

Read more

Opnun göngudeildar á ný

Það er okkur mikil gleði að tilkynna að við fengum grænt ljós frá heilbrigðisyfirvöldum til að opna aftur dyr göngudeildarinnar þann 4.maí næstkomandi.

Við opnum samkvæmt hefðbundnum opnunartíma en okkur ber áfram að gæta að 2 metra reglunni, þ.e tveir metrar á milli fólks og að við munum gæta að því áfram að sótthreinsa reglulega snertifleti eins og posa og hurðarhúna.

Við hlökkum mikið til að sjá ykkur öll aftur. Verið hjartanlega velkomin.

Read more

Fylgisjúkdómar psoriasis

 – Sjúkdómar sem gott er að vera vakandi fyrir

Fólk með psoriasis í húð og liðum er í aukinni hættu á að þróa með sér langvinna fylgisjúkdóma. Orðið fylgisjúkdómur þýðir í raun sjúkdómur sem kemur í kjölfar annars sjúkdóms. Áætlað er til að mynda að 30% þeirra sem fá psoriasis í húð fái psoriasis liðagigt. Ennfremur er fólk með sjúkdóminn í aukinni hættu að þróa með sér hjarta og æðasjúkdóma, fá svæðisgarnabólgu, þjást af offitu, fá sumar tegundir af krabbameini og kljást við andleg veikindi.

Beinþynning

Beinþynning einkennist af því að beinþéttni eða beinmagn minnkar. Sumir sjúkdómar hafa áhrif á kalkbúskapinn og geta valdið beinþynningu. Þeirra á meðal eru liðagigt og langvinnir meltingar- eða lifrarsjúkdómar. Lyf geta einnig haft áhrif á beinþéttni og sykursterar eins og prednisolon sem notað er við asthma og bólgusjúkdómum er eitt þeirra lyfa sem er talið geta valdið beinþynningu. Rannsókn frá árinu 2014 staðfesti mikil tengsl á milli sjúkdómanna psoriasis og beinþynningar. Hátt hlutfall þeirra sem voru með psoriasis reyndust vera með beinþynningu.

Crohns sjúkdómur

Þeir sem eru með psoriasis eru í aukinni hættu á að fá bólgusjúkdóma í þörmum. Þar á meðal er svokallaður crohns sjúkdómur sem hefur verið nefndur á íslensku svæðisgarnabólga. Chrohns er langvinnur ólæknandi bólgusjúdómur sem herjar yfirleitt á ristilinn eða neðri hluta smáþarma. Sjúklingurinn fær slæm tímabil sem einkennast af hita, kviðverkjum, niðurgangi og sjúkdómurinn getur haft þau áhrif að sjúklingurinn megrast. Þess á milli hefur sjúklingurinn lítil eða engin einkenni af sjúkdómnum. Svæðisgarnabólga veldur bólgubreytingum þar sem hann er í þörmum og veldur sárum sem geta stundum leitt til mikilla blæðinga. Þegar þau gróa myndast ör sem geta leitt til þrenginga í þörmum.

Hjarta -og æðasjúkdómar

Fólk með psoriasis er í aukinni hættu á að fá hjarta -og æðasjúkdóma. Samkvæmt einni rannsókn eru þeir sem eru með alvarleg einkenni af psoriasis 58% líklegri til að fá hjartasjúkdóma en 43% líklegri til að fá heilablóðfall.

Krabbamein

Nokkrar rannsóknir hafa leitt í ljós  að því að fólk með psoriasis og psoriasis gigt er í aukinni hættu á fá ákveðnar tegundir krabbameins, svo sem eitlaæxli og húðkrabbamein. Niðurstöður yfirgripsmikillar rannsóknar sem gerð var í Taiwan um áhættuþátt þess að psoriasissjúklingar fái krabbamein leiddi í ljós á þrátt fyrir að psoriasis sjúklingar séu í meiri hættu á að fá krabbamein er talið að UVB ljósameðferð auki ekki hættuna, heldur þvert á móti minnki líkurnar á að psoriasis sjúklingar fái krabbamein. Nýleg rannsókn leiddi í ljós að engin ein meðferð eykur hættuna á krabbameini, sem bendir til þess að sjúkdómurinn sjálfur veki áhættuna.

Lifrarsjúkdómar

Fólk með psoriasis í húð og liðum er í aukinni hættu á að þróa með sér fitulifrarkvilla án áfengis sem kallast NAFLD (nonalcoholic fatty liver disease). Í einni rannsókn frá árinu 2009 kom í ljós að einstaklingar með NAFLD voru yfirleitt með hátt PASI gildi* óháð því hvað þau voru búin að vera lengi með psoriasis, aldri, kyni, líkamsbyggð og áfengisneyslu.
*PASI gildi stendur fyrir Psoriasis Area and Severity Index og felur í sér aðferð sem notuð er til að meta útbreiðslu, roða og þykkt psoriasis útbrota.

Lithimnubólga

Lithimnubólga er bólga í miðjulögum augans sem samanstendur af lithimnu (iris), æðahimnu (choroid) og brárkleggja (cilliary body) sem framleiðir augnvökvann. Psoriasissjúklingar eru í aukinni hættu á að fá lithimnubólgu samkvæmt nýlegum rannsóknum. Yfirleitt þarf sérstaka meðferð við einkennum lithimnubólgu.

Offita

Mikil tengsl eru á milli psoriasis og offitu. Fólk með alvarleg einkenni af  psoriasis gigt er í enn meiri áhættuhópi, en samkvæmt nýlegri rannsókn greindust 44% psoriasissjúklinga, með offitu.
Notaður er líkamsþyndarstuðull (BMI) við skilgreiningu á offitu þar sem formúlan (þyngd/hæð2) er notuð til að meta hvort viðkomandi sé of þungur. Rannsóknir sýna að það að léttast getur minnkað einkenni psoriasis.

Sykursýki

Psoriasissjúklingar eru í aukinni hættu á að fá týpu 2 af sykursýki samkvæmt rannsókn frá árinu 2012. Týpa 2 af sykursýki er að mestu áunnið heilsufarsvandamál og orsakast af því að þegar framleiðsla insúlíns í líkamanum er ekki nægilega mikil. Einkenni sykursýkis eru þorsti, þreyta, tíð þvaglát, lystarleysi og þyngdartap, sýkingar í húð og slímhúð og kláði umhverfis kynfæri.

Þunglyndi og kvíði

Psoriasis í húð og liðum getur valdið fólki mikilli andlegri vanlíðan og getur einnig haft áhrif á sjálfstraust. Rannsókn sem birt var í Journal of Rheumatology í maí 2014 sýnir fram á að fólk með psoriasis gigt er í meiri hættu á að verða fyrir þunglyndi og kvíða en þeir sem eru einungis með psoriasis í húð. Þar kom fram að 36,6% þátttakenda með psoriasis gigt, þjáðust af kvíða á meðan 22,2 þjáðust af þunglyndi. Rannsóknir sýna einnig að meðhöndlun psoriasis getur létt einkenni þunglyndis.

Read more

Tímabundin lokun göngudeildar Spoex

Í fullu samráði við heilbrigðisyfirvöld hefur verið tekin sú ákvörðun að loka göngudeild Spoex á meðan veirusýkingin covid-19 stendur sem hæst. Það er ekki unt að halda starfseminni gangandi og tryggja fullt öryggi skjólstæðinga eins og mál standa nú.

Við munum að sjálfsögðu opna aftur um leið og unt er og tilkynnum bæði á hér á heimasíðu Spoex og facebooksíðu félagsins um framvindu mála. 

Þangað til biðjum við ykkur að vera skynsöm því sjúklingahópur okkar er einstaklega viðkvæmur, einkum þeir sem eru á ónæmisbælandi lyfjum.

Read more