Um Spoex

SPOEX er líknarfélag og var stofnað þann 15. nóvember 1972. Það starfrækir í dag skrifstofu og göngudeild fyrir fólk með húðsjúkdóma í eigin húsnæði að Bolholti 6 í Reykjavik.

Á göngudeildinni, sem starfar undir eftitliti sérfræðings í húðsjúkdómum, er boðið upp á UVB ljósameðferð samkvæmt tilvísun frá húðsjúkdómalæknum.

Hjá félaginu starfa skrifstofustjóri á skrifstofu og 2 sjúkraliðar með menntun á heilbrigðissviði á göngudeild.

Félagsmenn nú eru um 1.400. Yfirgnæfandi meirihluti þeirra, u.þ.b. 1.250 manns, eru psoriasissjúklingar. Exemsjúklingar eru um 100. Aðrir félagsmenn eru velunnarar og styrktarfélagar.

Psoriasis er algengur sjúkdómur sem talinn er hrjá 2-4% jarðarbúa. Ekki er vitað nákvæmlega um útbreiðslu hans á Íslandi, en yfirleitt er talið að psoriasissjúklingar séu eigi færri en 6.000. Fjöldi exemsjúklinga er enn meira á reiki, en nokkuð víst að þeir séu eigi færri en 10%-12% landsmanna. Þá getur psoriasis valdið psoriasisgigt og þar til nýlega var álitið að 7% psoriasissjúklinga fengju psoriasisgigt en nýlegar rannsóknir sýna að allt að 30% psoriasissjúklinga greinast með psoriasisgigt.

Markmið félagsins er fyrst og fremst að gæta réttar sjúklinganna og stuðla að betra og ríkara lífi þeirra með fræðslustarfsemi og kynningu á sjúkdómunum. Stjórn félagsins skipa 7 manns, þar af eru 2 varamenn og er öll vinna stjórnar unnin í sjálfboðavinnu. Jafnframt hafa margir félagsmenn og velunnarar vítt og breitt um landið lagt félaginu lið í gegnum tíðina.

Á landsbyggðinni eru 16 SPOEX deildir: Á Akureyri, Blönduósi, Borgarnesi, Egilsstöðum, Patreksfirði, Húsavík, Höfn, Ísafirði, Keflavík, Sauðárkróki, Selfossi, Seyðisfirði, Siglufirði, Stykkishólmi, Vestmannaeyjum og Vík í Mýrdal.

SPOEX er stofnaðili að alþjóðlegum samtökum IFPA og norrænum samtökum psoriasissjúklinga NordPso, þar sem psoriasisfélög á Norðurlöndum eiga aðild að. Samstarfið við félagadeildir innan þessara stofnana er í mörgum tilfellum náið, einkum meðal félaga norrænu samtakanna.